Zhvillimet e fundit në Maqedoni, përkatësisht dhuna ndaj të rinjëve shqiptarë nga ekstremistë maqedonas, ka shtyer disa qytetarë ta fshijnë flamurin e Maqedonisë nga obelisku i pavarësisë “NEWBORN”. Në disa video qe kanë qarkulluar në internet, janë parë një grup tifozësh që fshijnë flamurin e Maqedonisë në shenjë proteste për dhunën e ushtruar ndaj shqiptarëve në Maqedoni. Kjo është konfirmuar edhe nga ideatori i këtij monumenti, Fisnik Ismaili i cili përmes Facebook-ut ka konfirmuar se flamuri i Maqedonisë është hequr nga NEWBORN. Ky i fundit i ka sugjeruar Hajredin Kuçit të punojë më shumë për bashkëkombasit në Luginë e në Maqedoni. “I nderuemi Zavendës-Kryeministër, sa lodhesh tuj u brengosë se a po i shlyen dikush flamujt, apo jo, nisja lodhu për bashkëkombasit e tu në Shkup edhe Luginë (se për këta në Mitrovicë për çdo ditë po ta përkujtojmë). Nuk mjafton veç nji deklaratë e lodhët e Ministrisë së Punëve të Jashtme, e cila, si zakonisht, e "dënon" dhunën me dy paragrafa tekst, pa ndërmarrë asgë konkrete”, ka thënë Ismajli./Indeksonline/